ပဲခူးတွင် ကျောင်းသားစစ်ကြောင်းကို ဖြိုခွဲနေသည့် ရဲနှင့်စစ်တပ်ကို လူထုက ပြန်ဝိုင်းထား
ဧရာဝတီ၊ မတ် ၁၄ ၊ ၂၀၂၁
ပဲခူးမြို့ ပုဏ္ဏားစု ရပ်ကွက်တွင် ဆန္ဒပြနေသော ကျောင်းသားသပိတ်ကို ဝင်ရောက်ဖြိုခွဲနေသည့် စစ်တပ်နှင့်ရဲကို ပဲခူးမြို့လူထုက အင်အားမြောက်အမြားဖြင့် ပြန်လည်ဝိုင်းရံ ပိတ်ဆို့ထားကြောင်း သိရသည်။
ကျောင်းသားသပိတ်စစ်ကြောင်းသည် နံနက် ၉ နာရီခန့်တွင် အကြမ်းဖက်ဖြိုခွဲခံရခြင်း ဖြစ်ကြောင်း ပဲခူးမြို့နယ် အထွေထွေသပိတ်ကော်မတီမှ ပြောရေး ဆိုခွင့်ရှိသူတဦးကပြောသည်။
“စစ်ကြောင်းအလုံးအရင်းနဲ့ ဝင်ပြီး ချေမှုန်းတယ်။ သူတို့ လမ်းတွေထဲအထိ လိုက်ပြီး ပစ်ခတ်နေတယ်။ မှော်ကန်ဘက်မှာတော့ လူတွေကလည်း ရရာ လက်နက်ကိုင်ပြီးတော့ သူတို့ကိုပြန်ဝိုင်းထားတယ်။ အခုက သူချ၊ ကိုယ်ချတွေရှိနေပါတယ်”ဟု ၎င်းက ပြောသည်။
စစ်တပ်နှင့် ရဲက သေနတ်နှင့် ပစ်ခတ်သောကြောင့် ဆန္ဒပြသူ အမျိုးသား ၂ ဦး သေနတ်ကျည်ထိမှန်ထားကြောင်းလည်း သိရသည်။
တဦးမှာ ပဲခူးမြို့ ပုဏ္ဏားစု ၅ လမ်းထိပ်တွင် ရှိနေစဉ် လက်နှင့် ပေါင်ကို သေနတ်ကျည်ထိမှန်သွားခြင်းဖြစ်ပြီး နောက်တဦးမှာ မှော်ကန်လမ်း ၂၀ တွင် ရင်ဘတ်သို့ သေနတ်ကျည်ထိမှန်သွားခြင်း ဖြစ်ကြောင်း သိရသည်။
၎င်းတို့ ၂ ဦးအနက် ရင်ဘတ်သို့ သေနတ်ကျည်ထိမှန်သွားသူမှာ အသက်အန္တရာယ်စိုးရိမ်ရသည့် အခြေအနေတွင် ရှိသည်။
လက်ရှိတွင် ပဲခူးမြို့ ရေကျော်အရပ် ၊ နှင့် ဆန်တော်တွင်းလမ်းတို့မှ သပိတ်စစ်ကြောင်းများသည်လည်း စစ်တပ်နှင့် ရဲကို ဝိုင်းပတ်ပိတ်ဆို့ထားသော လူထုနှင့် ပူးပေါင်းရန် ချီတက်လာနေပြီဖြစ်သည်။
No comments:
Post a Comment